பூனைக்கு நன்றி

நிரந்தரமான ஒன்றின் மீது

நாம் ஒருபோதும் பந்தயம்

கட்டவில்லை , 

எந்த நேரமும் உடைந்து

சிதறிவிடும் கண்ணாடி 

குடுவைக்குள் தான் நம் 

ரகசியங்களை ஒளித்து வைத்தோம்

நாம் ஒருவரை ஒருவர் 

வந்து சேரும் வழித்தடத்தை

யானைக் கூட்டமொன்று 

சிதைத்துவிட்டது , இப்போது

நீ கடற்கரையிலும் , நான்

பாலையிலும் 

தேடிக் கொண்டிருக்கிறோம்

காலடி தடங்களை,

ரகசியங்களின் கண்ணாடி குடுவை 

கீழே வீழ்ந்திடாமல் காத்துக் கொண்டிருக்கும் 

நமது பூனைக்கு நன்றி

சொல்லியாகவேண்டும்.